ललितपुर, माघ १०
सिद्धिपुर घुम्टी सत्संग परिवारले हालै सम्पन्न सामूहिक ब्रतबन्ध तथा सामूहिक बाह्रा (गुफा) कार्यक्रममा देखाइएको माया, सहयोग, सद्भाव र हौसलाप्रति आभार प्रकट गरेको छ। यस गौरवपूर्ण कार्यक्रमले समाजमा धार्मिक, सांस्कृतिक तथा सामाजिक एकताको भावनालाई प्रवर्द्धन गरेको छ।
सत्संग परिवारले आगामी फाल्गुण १४ गते, अर्थात् महाशिवरात्रिका पावन अवसरमा १०८ मेहेर सागर पाठपारायणसहित चौथो पटक सामूहिक ब्रतबन्ध तथा बाह्रा (गुफा) कार्यक्रम आयोजना गर्ने घोषणा गरेको छ। यस विशेष कार्यक्रममा सहभागी हुन इच्छुक महानुभावहरूलाई समयमै सम्पर्क राखी नाम दर्ता गर्न आग्रह गरिएको छ।
कार्यक्रमले बालबालिकाको धार्मिक, सांस्कृतिक तथा परम्परागत संस्कारलाई संरक्षण गर्दै सामूहिक सहकार्यको महत्त्वलाई अझ प्रस्ट बनाउने उद्देश्य राखेको छ। यसै क्रममा, सत्संग परिवारले समाजका विभिन्न वर्ग, समूह र व्यक्तिहरूलाई यसमा सहभागी भई धार्मिक, सामाजिक तथा सांस्कृतिक गतिविधिलाई थप सशक्त बनाउन अपिल गरेको छ।
महाशिवरात्रिका दिन आयोजना हुने यस कार्यक्रमलाई सफल बनाउन स्थानीय समुदाय, शुभेच्छुक, तथा सहयोगी मनहरूलाई विशेष आह्वान गरिएको छ। यसले धार्मिक आस्था मात्र नभई सामूहिक संस्कारको पुनर्जागरणमा पनि योगदान दिनेछ।
सिद्धिपुर घुम्टी सत्संग परिवारले यस किसिमका कार्यक्रमले समाजमा भाइचारा, सहकार्य र आपसी सहयोगको भावना बढाउने विश्वास लिएको छ। सहभागी बन्न चाहनेहरूले यथाशीघ्र परिवारसँग सम्पर्क राखी आफ्नो सहभागिता सुनिश्चित गर्न अनुरोध गरिएको छ।